మార్ష్ సెంచరీ... వర్షంతో మళ్లీ ఆగిన ఐపీఎల్ మ్యాచ్

ఐపీఎల్ 2026లో భాగంగా రాయల్ ఛాలెంజర్స్ బెంగళూరుతో జరుగుతున్న మ్యాచ్‌లో లక్నో సూపర్ జెయింట్స్ బ్యాటర్ మిచెల్ మార్ష్ విధ్వంసక సెంచరీతో చెలరేగాడు. మార్ష్ మెరుపులతో లక్నో భారీ స్కోరు దిశగా దూసుకెళ్తున్న దశలో వర్షం మరోసారి అంతరాయం కలిగించింది. దీంతో ఆటను తాత్కాలికంగా నిలిపివేశారు. ఆట ఆగే సమయానికి లక్నో 14 ఓవర్లలో వికెట్ నష్టానికి 145 పరుగులు చేసింది.

లక్నోలోని ఏకానా స్టేడియంలో జరుగుతున్న ఈ మ్యాచ్‌లో టాస్ గెలిచిన ఆర్సీబీ బౌలింగ్ ఎంచుకుంది. అయితే, వారి నిర్ణయం తప్పు అని నిరూపిస్తూ మిచెల్ మార్ష్ ఆకాశమే హద్దుగా చెలరేగాడు. కేవలం 51 బంతుల్లో 9 ఫోర్లు, 9 సిక్సర్లతో అజేయంగా 107 పరుగులు చేసి క్రీజులో ఉన్నాడు. జట్టు మొత్తం స్కోరులో 70 శాతానికి పైగా పరుగులు మార్ష్ చేయడం విశేషం. మరో ఓపెనర్ అర్షిన్ కులకర్ణి (17) నెమ్మదిగా ఆడి కృనాల్ పాండ్యా బౌలింగ్‌లో ఔటయ్యాడు.

అనంతరం క్రీజులోకి వచ్చిన నికోలస్ పూరన్ (14*) కూడా దూకుడుగా ఆడుతుండగా వర్షం మొదలైంది. దీంతో అంపైర్లు ఆటను నిలిపివేసి, మైదానాన్ని కవర్లతో కప్పించారు. ఆర్సీబీ బౌలర్లలో కృనాల్ పాండ్యా ఒక్కడే వికెట్ తీశాడు. మిగతా బౌలర్లందరూ భారీగా పరుగులు సమర్పించుకున్నారు.